1397 Januar 12. Brieg

Ablösung der Landvogtei zu Brieg.

In gots namen amen. Wir Ludwig von gots gnaden herczoge in Slezien herre czum Brige bekennen offintlich in desem briffe allen den, dy en sehen, horen adir lezen, daz wir mit wolbedachtem mute, mit rechtin gewissen und mit rate unser getruwen mannen dy lantfoytey in der stat czum Brige, dy unser brudir, der hochgeborne furste herczoge Wenczla, dem got gnade, und wir vorkowft hatten, vor unsirs vatirs schulde mit alle dem rechte, alz se unsir vatir gehabt had, dem got gnade, umbe hundert marg und umbe sebin und fyrczig marg bemysschir pfennyge und polnisschir czal den erbern lewten der Hannusynne bey dem tore czum Brige, ern kynden und Swobisdorffs kynden und ern geerbin und czu erre hand Heynken von Jenkewicz und Nickel Cazmir burgern czum Brige, dy selbin lantfoytey habin wir abgelozt wedir Clemens Swobisdorff umbe dy vorgeschrebin summe geldis umbe habin se recht und redelich vorkowft umbe andirthalp hundert marg pregisschir grossin polnisschir czal unsern liben getruen den ratmannen und der stat czum Brige erplich und ewiclich czu habin, czu besiczczen, czu vorkewfin, czu vorwechsiln, czu vorseczczen und an ern nocz czu wenden umbe eyn sulch gelt, alz hy vorgeschrebin stet, daz awsgenomen, waz obir czen marg trit, daz dez nicht sullin czu richten habin, sundir iz zal in unser camyr gehorin, dornoch wenne wir dy zelbe lantfoytey wedirkowfin wellin, zo zal man se uns adir unsern geerbin czukowfin gebin vor daz vorgenante gelt ane alle wedirrede. Dez czu geczugnisse habin wir unser ingesegil an desen briff angehangin. Gegeben czum Brige am freytage nach dem obirsten tage nach gots gebort dreyczenhundirt jar in dem sebynde und newenczigsten jare; dobey synt gewest unser liben getruwen her Hannus von Schellindorff rittir, Hannus von Borsnicz, Lewthir von Rogaw, Henrich Rabenaw, Hannus Dobryn, Jban Nassa und her Thomas.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.